Vi fekk prøve å lytte etter eigen hjartelyd gjennom eit stetoskop, og vi fekk prøve å kike gjennom eit otoskop. Det var ikkje så lett å kike inni eigne øyre, men vi fekk sjå at otoskopet har eit lite lys og eit forstørringsglas slik at veterinæren skal sjå godt i dyreøyra når han brukar det. Vi fekk også vite at smådyr og store dyr er to dyregrupper som veterinærane jobbar med.

Det er ikkje alltid storleiken som avgjer kva dyregruppe dyret høyrer til (ein hund kan jo vere større enn ei høne eller ein sau). Det avgjerande er om dyret er kjæledyr, eller om det er eit dyr vi kan ha for å få kjøt, drikke, skinn, pels eller dun ifrå. Vi fekk også sjå korleis ein dyrlege må kle på seg før ein operasjon, og vi fekk helse på ein skjønn katt som heiter Tuva! Vi fekk også vite at det er viktig å kunne matematikk for å gje riktig mengde medisin, og vi fekk ei ekte sprøyte på kvar!

Elevane fekk også svar på mange av spørsmåla sine, t.d. om kor lenge ein må gå på skule for å bli veterinær, om løven eller tigeren ville ha vunne ein slostkamp, kor gamal ein katt kan bli, og om det er dyrevernsnemnd i Meland kommune, kva som skjer med dyr som vert avliva og mykje meir. Timen kunne ha vore lenger, friminuttet var ikkje interessant denne gongen, og nokon hadde ikkje lyst å gå heim!

Takk til Erik for ein lærerik og kjempegøy time!